Jordmor og svangerskapsomsorg

Velkommen til svangerskapsomsorga i Høyanger kommune!

Svangerskapsomsorga er eit gratis tilbod til alle gravide om kontrollar gjennom heile svangerskapet. Målet er å sikre at svangerskapet utviklar seg så normalt som mogleg både for babyen og for dykk som skal verte foreldre.

Jordmortenesta er ein del av Høyanger helsestasjon og me samarbeidar tett med fastlege, spesialisthelsetenesta, helsesjukepleiarar, psykolog, fysioterapeut og barnevern.

Våre tilbod

Skal du velge jordmor eller fastlege?

Etter retningslinjer for svangerskapsomsorga i Noreg har du som gravid rett til å velge om du vil ha oppfølging frå jordmor eller lege i svangerskapet. Du kan òg velge å gå til både jordmor og lege.

Nokre tilstandar i svangerskapet krever at fastlegen, eventuelt spesialisthelsetenesta, er involvert sjølv om du i utgangspunktet går til oppfølging hjå jordmor.

Ta tidleg kontakt med jordmor eller fastlegen din om du er gravid. Målet er å gi tilbod om time innan ei veke etter oppretting av kontakt.

Jordmortenesta brukar Digi helsestasjon/Helse Norge til å kommunisere med brukarane.

Kontaktinformasjon til jordmor

Alle konsultasjonane er gratis. Første konsultasjon varer i ca. 60 - 90 minutt. Vidare konsultasjonar varar i 30 - 60 minutt.

Konsultasjonane omfattar:

helseundersøkingar
prøvetaking
samtalar
informasjon
rettleiing
rådgivning

Plan for svangerskapskontrollar

Plan for svangerskapskontrollar
Svangerskapsveke	Kontroll
Veke 6-12	Første svangerskapskontroll
Veke 11-14	Tidleg ultralyd, Helse Førde HF
Veke 15-17	Andre svangerskapskontroll
Veke 17-19	Ultralyd, Helse Førde HF
Veke 24	Tredje svangerskapskontroll
Veke 28	Fjerde svangerskapskontroll
Veke 32	Femte svangerskapskontroll
Veke 36	Sjette svangerskapskontroll
Veke 38	Sjuande svangerskapskontroll
Veke 40	Åttande svangerskapskontroll
Veke 41	Overtidsvurdering, Helse Førde HF

Gravide som har behov for tettare oppfølging får tilbod om dette individuelt.
Rutinemessige blodprøvar må takast hjå eigen fastlege. Jordmor kan måle blodprosenten i svangerskapet og hjelpe med bestilling av glukosebelastningstest.
Jordmor kan bistå med tilrettelegging av arbeidssituasjonen din under svangerskapet og kan søkje om svangerskapspenger ved behov.

Dette skal du ta med på kontroll

Kvar gong du skal på kontroll, skal du ta med

helsekortet ditt (som du får på den første svangerskapskontrollen)
urinprøve (teken om morgonen same dag som du skal til kontroll

Når skal du ta kontakt med fødeavdelinga?

Viss barnet er veldig stille og ikkje rører på seg.
Ved vatnavgang.
Viss du har sterke rier.
Ved blødning.
Viss du har smerter i magen som ikkje er rier.

Fødeavdelingen ønskjer at du ringer før du kjem slik at dei kan vere førebudde på å ta imot deg og partneren din. Ring 578 39 233 eller 578 39 132 (etter kl. 15.00) og du vil få snakke med ei jordmor.

Viss du har tankar kring fødselen og/eller barseltida kan du skrive dei ned i eit “ønskjebrev” som du kan legge ved dei andre svangerskapspapira dine.

Oppfølging etter fødsel og heimebesøk

Kommunejordmor tilbyr heimebesøk 1-3 dagar etter heimkomst frå sjukehuset.
Det er ingen vidare fast oppfølging frå jordmor etter dette. Ønskjer du time til etterkontroll, samtale eller hjelp med amming tek du sjølv kontakt med jordmor for timebestilling.

Helsesjukepleiar tilbyr heimebesøk 7-10 dager etter fødsel og vil no ta over ansvaret for den nyfødde og familien. Dei vil informere om det vidare tilbodet ved helsestasjonen for barn 0-5 år.

Etterkontroll

Etterkontroll etter fødsel skjer vanlegvis ca. 6-8 veker etter fødselen, men kan òg skje tidlegare/seinare om du ønskjer det. Du avgjer sjølv om du ønskjer etterkontroll hos jordmor eller fastlege etter fødsel. Du må sjølv bestille time til etterkontroll. Konsultasjonen etter fødselen er gratis, uansett om du går til jordmor eller fastlegen.

Er du frisk, har hatt eit normalt svangerskap, fødsel og barseltid kan du fint gå til jordmor. Jordmor jobbar med kvinnehelse og kan mykje om dette tema. Jordmor har kompetanse til å ivareta deg på denne kontrollen.
Har du grunnleggande sjukdommar eller brukar faste medisinar som skal følgjast opp, eller har du hatt spesielle komplikasjonar knytt til svangerskapet, som til dømes svangerskapsforgiftning, høgt blodtrykk eller svangerskapsdiabetes, kan det være naudsynt å få ein time hjå fastlegen din også etter fødselen.

NB: Er det aktuelt for deg å ta celleprøve og/eller sette inn spiral etter fødsel må du per dags dato til fastlege for å få gjort det.

Dette vert gått igjennom ved etterkontrollen:

Gjennomgang av fysisk og psykisk helse
Tida etter fødsel og/eller tankar om fødselen.
Problem du ønskjer å ta opp, som til dømes blødningar etter urinlekkasje.
Informasjon og tilbod om prevensjon
Amming
Sex og samliv
Eventuelt klinisk undersøkelse
Blodtrykk
Hb (blodprosent)
Bekkenbunnstrening

Fysisk aktivitet og trening i barseltida

Fysisk aktivitet kan gi overskot og kjennes godt for både kropp og sjel i barseltida. Hugs at du nettopp har gjennomgått både svangerskap og fødsel. I tillegg har du eit nyfødd barn du skal bruke tid på og bli kjent med. Dei første vekene treng du mykje søvn og kvile, og tid til å omstille deg til den nye livssituasjonen.

Det er viktig å byrje gradvis og forsiktig med fysisk aktivitet. Dersom du var lite fysisk aktiv under svangerskapet er det ekstra viktig å gi kroppen tid til å komme i form igjen. Både bekkenbotnen og magemusklane er tøyd etter svangerskap og fødsel. I tillegg blir leddbanda påverka av svangerskapshormona slik at du fortsatt vil vere ustabil i ledda.

Nyttige nettsider om trening etter svangerskap og fødsel:
NHI
Helse Norge
Bekkenbunnsportalen

Vil du vite meir?

Her finn du brosjyrar og lenker til nyttige og trygge nettstader.

Sist endra 11.03.2024 15.06