Synfaring i samband med taksering av eigedomar

Arbeidet starta opp i slutten av august og skal etter planen være ferdig i oktober. Alle eigedomar skal synfarast utvendig. Dei som ser på eigedomen vil sjekke fakta som er registrert i matrikkelen, eventuelt måle opp bygg utvendig og registrere manglande opplysningar. I tillegg vil dei ta bilete av bygg og dokumentere tilhøve som påverkar verdifastsetjinga. Dei som ser på eigedomen, vil ha på seg refleksvest med kommunen sin logo og legitimere seg med ID-kort.

Sunniva, Julia og Marit frå ESKAN AS er i gang med synfaringsarbeidet.

Alle heimelshavarar (eigarar) er varsla om synfaringa i eige brev. 

Retningslinjer for taksering

Kommunestyret i Høyanger har valt medlemmar til sakkyndig nemnd og sakkyndig klagenemnd. Det er sakkyndig nemnd som har fått ansvaret for takseringsarbeidet, og som fastset grunnlaget for eigedomsskatt på eigedomen. Høyanger kommune har engasjert firmaet ESKAN AS til arbeidet med synfaring av eigedomar. Som eit hjelpemiddel til synfaringa og den påfølgjande takseringa vil det bli utarbeida eigne takseringsreglar. Dokumentet vert tilgjengeleg på kommunen si nettside når det vert endeleg vedteke. Takst og utrekna eigedomsskatt for 2027 vert lagt ut til offentleg ettersyn innan 1. mars 2027.