Introduksjonsprogram

Målet med introduksjonsprogrammet er å gi deltakarane grunnleggande ferdigheiter i norsk, grunnleggande innsikt i norsk samfunnsliv og førebu dei til arbeid eller utdanning.

Flyktningar som busettast i Høyanger kommune etter avtale med IMDi, vil få innkalling til samtale av integreringstenesta.

Personar som kjem ved familieinnvandring må sjølv søke seg inn i programmet. Dei kan også ta direkte kontakt med integreringstenesesta for informasjon om rettar.

Målgruppa er personar mellom 18 og 60 år som:

• Har fått asyl og dermed status som flyktningar
• Er overføringsflyktningar
• Har fått opphald på humanitært grunnlag etter en søknad om asyl
• Er familiesameint til dei gruppene som er nemnde over
• Er personar som etter samlivsbrot har fått opphaldsløyve på sjølvstendig grunnlag på grunn av mishandling i samlivet

For personar som har fått opphaldsløyve før 1. januar 2021, gjeld framleis introduksjonslova frå 2003.

Lov om integrering gjennom opplæring, utdanning og arbeid (integreringsloven) gjeld for:

• Personar som får opphaldsløyve etter 1. januar 2021.
• Personar som får opphaldsløyve før 1. januar 2021 men kjem til Noreg etter 1. januar 2021.

Deltakarar i målgruppa for introduksjonsprogram har rett og plikt til å gjennomføre kompetansekartlegging og karriererettleiing. Dette skal bidra til introduksjonsprogrammet blir tilpassa den einskilde sitt behov. Kommunen skal sørge for kompetansekartlegging og fylkeskommunen skal sørge for karriererettleiing.

Introduksjonsprogrammet er individuelt tilpassa kvalifisering på fulltid, og målsettinga er å styrke moglegheitene for deltaking i yrkes- og samfunnsliv for innvandrarar, samt å styrke deira økonomiske sjølvstende. Introduksjonsprogrammet skal minst innehalde:

1. opplæring i norsk
2. opplæring i samfunnskunnskap
3. kurs i livsmestring
4. arbeids- eller utdanningsretta element

Deltakarar som har barn under 18 år skal delta på kurs i foreldrerettleiing. Det same gjeld deltakarar som får barn i løpet av programmet.

Ein viktig del av introduksjonsprogrammet er arbeidstrening. Målet med å vere i arbeidstrening er å betre nivået i munnleg norsk gjennom deltaking i ein arbeidskultur. Deltakarane får eit norsk nettverk gjennom arbeidsplassane, noko å setje på CV-en, og moglegheit til å få jobb dersom dei viser evne og vilje til det. Difor skal alle deltakarar i introduksjonsprogrammet ha arbeidstrening – ikkje berre dei som har arbeid som mål i den individuelle planen, men òg dei som går i eit utdanningsløp.

Kommunen skal setje eit sluttmål for den einskilde sitt program. Det er utdanningsbakgrunn som er førande når ein set sluttmål og varigheit for programmet.

Kommunen skal i samarbeid med deltakaren utarbeide ein integreringsplan og ei integreringskontrakt (jf. §§ 15 og 16 i integreringslova).

Deltaking i programmet gir rett til introduksjonsstønad. Full stønad utgjer to gongar folketrygda sitt grunnbeløp per år.

• Deltakarar som er gifte eller sambuarar utan barn får 5/6 av full stønad.
• Deltakarar under 25 år som ikkje bur saman med foreldre får 2/3 av si sats.
• Deltakarar under 25 år som bur saman med ein eller begge foreldra får 1/3 av si sats.

Reduksjonar for alder og sivilstatus blir kombinerte dersom begge gjeld.

Stønaden er skattepliktig. For å kunne motta introduksjonsstønad må ein delta aktivt i introduksjonsprogrammet. Programmet følgjer arbeidslivets reglar for frammøte, og ugyldig fråvær fører til trekk i stønaden.